அமெரிக்க அரசாங்கத்தால் அறிவிக்கப்பட்ட வரிகளில் இருந்து நிவாரணம் பெற ஜனாதிபதி அநுரகுமாரவின் தலையீடுகள் பாராட்டுக்குரியது என தெரிவித்து இலங்கை ஆடைத் தொழில் உரிமையாளர்கள் நன்றி தெரிவிக்கின்றனர்.
அமெரிக்க அரசாங்கம் அறிவித்த 90 நாள் வரித் தடை மற்றும் இந்தப் பிரச்சினையைத் தீர்க்க ஜனாதிபதி அநுரகுமார திசாநாயக்க எடுத்த நடவடிக்கைகள் இலங்கை ஆடைத் துறையினரால் பாராட்டப்பட்டுள்ளன.
அமெரிக்க வரிகள் குறித்த சமீபத்திய அறிவிப்பு தொடர்பாக இலங்கை அரசாங்கமும் ஜனாதிபதி அநுரகுமார திசாநாயக்கவும் எடுத்த உடனடி மற்றும் தீர்க்கமான நடவடிக்கைக்கு கூட்டு ஆடை சங்கங்கள் மன்றம் தனது நன்றியைத் தெரிவித்துக் கொண்டது.
அமெரிக்க வர்த்தக பிரதிநிதி அலுவலகத்துடன் சரியான நேரத்தில் நடைபெற்ற கலந்துரையாடல்கள், ஜனாதிபதி அநுரகுமார திசாநாயக்க ஜனாதிபதி டொனால்ட் ட்ரம்புடன் மேற்கொண்ட முறையான தொடர்பு, அத்துடன் தொழில்துறையைப் பாதுகாப்பதில் இலங்கை அரசாங்கம் எடுத்த நடவடிக்கைகள் ஆகியவற்றை கூட்டு ஆடை சங்கங்கள் மன்றம் பாராட்டுகிறது.
இந்த முயற்சிகள் இலங்கையின் ஏற்றுமதித் தொழில்களைப் பாதுகாப்பதற்கான அரசாங்கத்தின் உறுதிப்பாட்டின் வலுவான அறிகுறியாகும், மேலும் இந்தத் துறை முழுவதும் வாழ்வாதாரங்களைப் பாதுகாக்கவும் நம்பிக்கையைப் பேணவும் உதவும்.
90 நாள் இடைநிறுத்த காலத்திற்குப் பிறகும் அமெரிக்காவுடனான பரஸ்பர நன்மை பயக்கும் வர்த்தக ஒப்பந்தத்தை முடிக்க, ஏற்கனவே தொடங்கப்பட்ட விரைவான மற்றும் தீர்க்கமான நடவடிக்கையைத் தொடர்வது முக்கியம் என்று கூட்டு ஆடை சங்கங்கள் மன்றம் தெரிவித்துள்ளது.
